Helpende Hand het die afgelope maand ons ondersteuners gevra om op ons Facebook-blad te gaan vertel watter onderwyser ʼn impak op hul lewens gemaak het. Dit was op 5 Oktober Wêrelddag vir die Onderwyser, maar by Helpende Hand voel ons so sterk oor opleiding as ʼn manier om armoede uit te roei, dat ons besluit het om die hele Oktober aan onderwysers te wy.
Anell de Beer het laat weet dat mnr Arrie Henn ʼn manier gehad het “om elke liewe kind belangrik te laat voel. Hy het almal presies dieselfde hanteer en homself nie belangriker as die res geag nie”.
Onderwysers wat werklik hul roeping uitleef en hoop vir die toekoms skep, het self ook kommentaar gelewer. Een so ʼn onderwyser, Charne Esthuizen, vertel hoe sy ʼn oud-leerling raakgeloop het wat na ʼn dekade steeds onthou hoe lekker haar juffrou geruik het. “Eintlik geniet ek my werk so baie, dis moeilik om uit te sonder… maar wat baie spesiaal is, is die briefies wat so in my pennesakkie of dagboek gedruk word… ek het ʼn boks waarin ek elkeen bêre,” sê sy.
Charne onthou ook hoe ʼn belangrike rol sy in ʼn seun met disleksie se skoolloopbaan gespeel het. Sy ouers het haar gevra om hom te help om sy matriekeksamen mondelings af te lê. Hy het haar na afloop van die eksamen bedank in ʼn brief wat hy self geskryf het en sy kon die liefde en waardering daarin sien.
“Ek het nou nog kontak met my heel eerste klas. Hulle is nou almal getroud en het self kinders, maar dit laat my voel ek het iewers iets beteken en vir my is dit my roeping,” sê sy.
Besoek Helpende Hand se Facebook-bladsy (http://www.facebook.com/helpendehand) en nomineer daar jou gunsteling-onderwyser en loer ook wat ander ondersteuners oor hulle onderwysers te sê gehad het.
