Alkoholmisbruik onder Tieners – Ouers, dit is wat julle moet weet!

Alkoholmisbruik is ‘n toenemende probleem onder tieners in Suid-Afrika. Selfs die verantwoordelikste tiener is al in ‘n oomblik van groepsdruk of ‘n verkeerde keuse daardeur geraak. Die verskynsel begin al hoe vroeër; sommige kinders begin al op 11 jaar drink.

Die erns van die probleem

Maar hoe ernstig is die probleem regtig? En wat kan jy as ouer doen om jou kind teen die gevare van alkoholmisbruik te beskerm?

Liam (skuilnaam) was die tipe seun waarop enige ouer sou trots wees – ‘n top- akademiese presteerder, uitblinker op die sportveld en geliefd onder sy medeleerders en onderwysers. ‘n Blink toekoms het vir hom gewink en hy was reeds goedgekeur om medies te studeer aan ‘n topuniversiteit. Maar een aand, net een aand van roekelose besluitneming, het sy drome verpletter.

Dit het begin met ‘n onskuldige partytjie. Liam wou nie die demper op die partytjie wees nie en het besluit om saam met sy vriende ‘n paar drankies te drink. Wat begin het as ‘n aand van “pret,” het geëindig in ‘n rampspoedige nag: ‘n dronkbestuurongeluk, ‘n kriminele rekord en ‘n kans op ‘n blink toekoms wat in ‘n oogwink verdwyn het.

Liam se storie is ongelukkig nie uniek nie. Tiener-alkoholmisbruik is nie net ‘n verskynsel onder “rebelse” kinders nie. Selfs die verantwoordelikste tieners kan onder groepsdruk swig en een verkeerde keuse kan hul lewens onherroeplik verander.

Binge drinking, oftewel oormatige inname van alkohol binne ‘n kort tydperk, is ‘n groot tendens onder Suid-Afrikaanse tieners. Dit neem veral onder meisies toe, wat dui op ‘n kommerwekkende kultuur rakende alkoholgebruik onder jongmense.

Waarom drink tieners?

Groepsdruk: Die behoefte om in te pas en deur vriende aanvaar te word, is ‘n groot dryfveer.

Media- en sosiale invloed: Rolprente, televisie en sosiale media bevorder dikwels die idee dat dit koel is om alkohol te gebruik.

Emosionele uitdagings: Baie tieners gebruik alkohol om stres, depressie of probleme by die huis te hanteer.

Toeganklikheid: Die swak toepassing van wetgewing maak dit maklik vir jongmense om drank te bekom.

Wat is die gevare van tiener-alkoholmisbruik?

Dronkbestuur: Een van die grootste gevare is dat jongmense onder die invloed bestuur. Dit skep ‘n lewensgevaarlike situasie en kan ‘n kriminele rekord tot gevolg hê.

Gesondheidsprobleme: Alkoholgebruik kan breinontwikkeling benadeel. Dit kan langtermyngevolge op die geheue en besluitneming hê.

Verslawing: Hoe jonger ‘n mens begin drink, hoe groter is die kans dat jy afhanklik raak van alkohol.

Hoe kan ouers keer dat hul kinders in dié strik trap?

Praat oop en eerlik: Begin ‘n gesprek oor alkoholgebruik met tieners sonder om te preek of dreig. Luister na hul menings en beantwoord hul vrae.

Wees ‘n rolmodel: Kinders leer deur waarneming. As ouers verantwoordelik met alkohol omgaan, leer tieners om dit ook te doen.

Verduidelik die gevolge: Tieners dink dikwels nie aan langtermyngevolge nie. Gebruik gevallestudies soos Liam se verhaal om die onherroeplike gevolge te beklemtoon. 

Stel duidelike grense: Pas jou huisreëls oor alkoholgebruik konsekwent toe en maak seker dat jou tiener die gevolge van oortreding verstaan.

Moedig gesonde aktiwiteite aan: Help jou tiener om betrokke te raak by sport, kulturele aktiwiteite of stokperdjies wat hulle besig hou en minder geneig maak om alkohol te gebruik.

Alkoholmisbruik onder tieners is ‘n werklikheid, maar dit beteken nie dat ouers magteloos is nie. Die sterkste wapen teen groepsdruk en swak besluitneming is ‘n huis waar kinders geborgenheid, ondersteuning en oop kommunikasie ervaar. As tieners weet hulle ouers het hulle onvoorwaardelik lief en respekteer hulle, is die behoefte om elders aanvaar te word, kleiner.

As jy ‘n gesonde vertrouensverhouding met jou kinders bou waarin hulle veilig voel om oor hul vrese, keuses en uitdagings te praat, help jy hulle om sterk en selfversekerd genoeg te wees om nee te sê vir alkoholmisbruik. So help jy nie net om hulle deur hul tienerjare te lei nie, maar ook om hulle voor te berei op ‘n volwasse lewe met gesonde besluitneming waar hulle hul volle potensiaal bereik.

Isabel Faurie
Maatskaplike werker, Solidariteit Helpende Hand