Brief 170: Alles sal regkom

#LieweLeser

Sommige dae voel die lewe vir my soos een groot, deurmekaar legkaart. 'n Duisend stukkies wat net nie in mekaar pas nie, want planne val uitmekaar en die antwoorde bly weg. Soms is dit loodswaar – veral op die dae wat gebede stil voel. Wanneer die lewe my plattrek, sal my pa my gewoonlik net een kyk gee, liggies op my skouer druk en vir my sê: "Alles sal weer regkom."

 

Dis daardie vier woorde wat vir my vertroosting gee wanneer ek nie 'n weg uitsien nie, maar weet dat dit wat ek ervaar net tydelik is.

 

Alles sal weer regkom. Dalk moet jy dit ook hoor?

 

Miskien sal dinge nie presies uitwerk soos jy dit beplan het nie. Die kanse is goed dat dit selfs mooier kan wees. Die lewe het 'n manier om ons met nuwe moontlikhede te verras op die tye wanneer ons net toe deure raaksien.

 

Hou aan hoop.

Hou aan bou.

Hou aan bid.

Hou aan probeer.

 

Want soos my pa al telkemale vir my gesê het: "Alles sal weer regkom."

En ek glo dat dit vir jou ook so sal uitwerk.

 

Vriendelike groete

Hilde Kruger

Solidariteit Helpende Hand

 

Lees jou briewe hier: https://hopklik.com/ljWMO

BRIEF 170_Alles sal regkom copy