Hegte verhoudings – die fondasie van vroeë kinderontwikkeling
Kinders floreer in die warmte van liefdevolle verhoudings. Die veiligheid van sorg, aandag en vertroue laat hul wortels groei en hul vlerke vorm kry. Die eerste paar lewensjare is van kardinale belang vir ‘n kind se emosionele, sosiale en kognitiewe ontwikkeling. In hierdie tydperk vorm hulle hegte verhoudings met hul ouers, versorgers en onderwysers; dit is die boustene van ‘n kind se selfbeeld en vermoë om in die toekoms gesonde verhoudings te bou.
Navorsing toon dat kinders wat liefdevolle en stabiele verhoudings ervaar wat tot geborgenheid lei, beter voorbereid is om te leer en emosionele veerkragtigheid toon. Dr. Bruce Perry, ‘n neurowetenskaplike, beklemtoon: “Kinders ontwikkel in verhoudings; deur liefdevolle interaksie leer hulle hul wêreld ken.” Wanneer ‘n baba huil en ‘n versorger reageer deur hom of haar te troos en versorg, ontwikkel die kind ‘n gevoel van veiligheid en vertroue.
In die kleuterskoolomgewing speel onderwysers ‘n belangrike rol in die vorming van hegte bande. ‘n Kind wat weet sy juffrou gee om en verstaan hom, het meer selfvertroue en leer met meer entoesiasme. As ‘n kleuter byvoorbeeld sukkel om haar skoenveters vas te maak en die onderwyser help en moedig haar geduldig aan, ervaar sy sukses en motivering.
Sterk verhoudings help ook met sosiale ontwikkeling. Kinders leer deur interaksie hoe om konflik op te los, emosies te verstaan en met ander te kommunikeer. ‘n Kind wat tuis liefde en aanvaarding ervaar, sal makliker vriende maak en positiewe verhoudings bou.
Leer om na jou kind te luister. Dit skep vertroue in julle verhouding en hy of sy graag al hoe meer met jou wil deel. Kinders spel liefde “T-Y-D”, daarom is kommunikasie en speel kardinaal vir enige ouer-kleuter-verhouding.
Die bou van hegte bande in die vroeë kinderjare is dus nie net ‘n emosionele behoefte nie, maar ‘n noodsaaklikheid vir gesonde ontwikkeling en om geborgenheid te vestig. Met liefde, aandag en konsekwente sorg lê ons die fondasie vir kinders se toekoms – en uiteindelik vir ‘n sterker samelewing.
Suzette Oosthuizen
Hoof van Sentrums en Nasionale Strukture: Solidariteit Helpende Hand