Hierdie onderrig sluit in ‘n kleuterskool en naskoolse dienste in ‘n veilige omgewing. Ons bied ‘n atmosfeer van Christelike waardes vir kinders uit die Afrikaanse-kultuur gemeenskap. Ons Plek is ‘n gemeenskapsprojek waar gemeenskapslede tot die volhoubaarheid van hierdie diens kan bydra en voorspoed vir elke kind kan help verseker.

Die eerste Ons Plek Naskoolsentrum se deure is amptelik geopen gedurende Oktober 2014 in die Strand waar ʼn behoefte identifiseer is vir 20 Afrikaanse skoolkinders om na skool binne ʼn veilige opbouende omgewing huiswerk te kan doen en ʼn maaltyd te kan ontvang alvorens hul terugkeer na die Karavaanpark waar hulle woonagtig was saam met hulle ouers.

Sedertdien het die dienste van 1 Naskoolsentrum met 20 leerlinge uitgebrei na 7 Ons Plekke waar dienste gelewer word aan meer as 400 kleuters en skoolleerling in samewerking met die groter gemeenskap.

Gemeenskapslede dien op  Sentrumkomitees, deel in fondsinsamelingsprojekte, tree op as donateurs vir kinders en voeg hul talente en tyd in die opbou en instandhouding van die Ons Plekke.

Die behoefte aan ʼn Ons Plek word identifiseer deur die gemeenskap en ondersoek deur die Streekorganiseerders en Maatskaplike werkers van Helpende Hand deur middel van gemeenskap analises en uitgebreide behoefte bepaling vraelyste.  Die klem word geplaas op behoefte maar ook op die kwaliteit en verdieping van dienste in samewerking met ander Bewegings instellings of opvoedkundige instansies.

Opleiding  aan personeel geniet prioriteit ten einde professionele dienste te kan lewer. Om kwaliteit dienslewering te verseker word slegs minimum personeel aangestel met ʼn minimum kwalifikasie.

Gemeenskapsontwikkeling by Helpende Hand begin by die jongste lid van die gemeenskap waar babas ontvang word in ʼn ons Plek kleuterskool en later as kleuter ʼn uitkoms gebaseerde program voltooi om skoolgereedheid te verseker.  Tydens sy leerreis op skool word hy verder ondersteun met huiswerk, skooltake en ander opvoedkundige verpligtinge.  Hierdie ondersteuning lei tot verbeterde skool prestasie wat aan die kind die geleentheid bied om ʼn tersiêre kwalifikasie te bekom met behulp van Helpende Hand se rentevrye studielening.  Na voltooiing van sy naskool opleiding, kan hy sy regmatige plek in die gemeenskap inneem om ʼn standvastige bydrae te maak ten opsigte van die ekonomie, groei in die gemeenskap en die skep van ʼn standaard binne ʼn waardegedrewe omgewing. Daarom word daar van elke lid van die gemeenskap, kind, ouer, individue of groep verwag om ʼn begeesterde saambouer te wees binne die struktuur wat Helpende Hand bied.

"Die opvoeding van 'n kind in 'n kultuur kleuterskool is nie slegs 'n investering in die hede nie, maar ook 'n bewussyn van die ryk erfenis wat hulle na die toekoms sal lei. Dit is nie net oor die oordrag van kennis nie, maar oor die vorming van 'n selfbewuste identiteit wat 'n kind se pad na sukses in die wêreld verhelder." – Onbekend

Flip Buys noem die volgende in sy boek “Vat jou goed en bou” : “Opleiding is die beste teenvoeter teen onbillikheid en is  lewenslange leer die sleutel tot ʼn vry, veilige en voorspoedige toekoms.  Gehalte van mense word deur opleiding en waardes bepaal.  Dit is hoe ons gaan oorleef.

Solidariteit Helpende Hand Ons Plek bied ʼn kultuurtuiste van uitnemendheid vir ons kleuters en kinders! Ons gee die aflosstokkie van geloof, opleiding, opvoeding en ontwikkeling aan vir die geslagte na ons.

Suzette Oosthuizen

Hoof van Sentrums en Nasionale Strukture