Die Forum vir Persone met Gestremdhede van Solidariteit Helpende Hand staan in diens van mense wie se stem dikwels stilgemaak of geïgnoreer word. Ons skep ruimtes waar inklusiwiteit, begrip en ondersteuning nie net gepraat word nie, maar aktief uitgeleef word. Hierdie forum is ’n platform vir dialoog, bewustheid, bemagtiging en praktiese betrokkenheid – ’n plek waar mense met gestremdhede en hulle families, ondersteuners en instansies wat spesifiek werk met persone en kinders met gestremdhede as vennote gesien, gehoor en waardeer word.

Ons jaarlikse LIGKonsert vier die menswaardigheid, talente en stories van mense met gestremdhede – ’n geleentheid waar gaste van eer gekombineer word met musiek, inspirasie en inklusiewe viering. Fondse wat hieruit gegenereer word maak deel uit van die LIGStudiefonds wat ‘n verdienstelike student met ‘n gestremdheid instaat stel om ‘n rentevrye studielening te bekom.

Die Se-jou-se kultuurkompetisie moedig kreatiewe uitdrukking aan en skep ’n platform vir unieke stemme om gehoor te word van kinders met gestremdhede

Ons bied ook ‘n jaarlikse Verrykingsoggend aan waar relevante kwessies rondom gestremdhede bespreek word – van regsaspekte en onderwys, tot toegang tot dienste en emosionele welstand.

Twee keer per maand hou ons aanlyn forumgesprekke waar deelnemers van regoor die land inskakel om kennis te deel, stories te vertel en mekaar te ondersteun. Daarbenewens bied ons netwerk geleenthede aan waar rolspelers uit verskillende sektore – van onderwys en maatskaplike werk, tot beleid en entrepreneurskap – bymekaar kom om sinvolle vennootskappe te bou.

Ons Forum bring mense saam, breek af grense en bou aan ’n samelewing waarin almal plek het – nie net in woorde nie, maar in aksie.