Solidariteit en Solidariteit Helpende Hand besef al meer dat dit nodig is om 'n krisisberaad aan te bied vir maatskaplike werkers en die organisasies saam met wie hulle ons gemeenskappe elke dag bedien.

Die doel van die beraad is hoofsaaklik om maatskaplike werkers en hulle helpers te ondersteun. In 2024 wil ons gemeenskappe aanmoedig om te fokus op vyf sleutelgebiede waarvan een aktiewe burgerskap is. Daarom het ons spesifiek 18 Julie gekies om die krisisberaad aan te bied, want 18 Julie is Mandela-dag.

Aktiewe burgerskap verwys na burgers se betrokkenheid by hul gemeenskappe en hulle deelname aan aktiwiteite wat die samelewing se algemene welsyn en vooruitgang bevorder. Dit behels nie net die nakoming van basiese burgerlike pligte soos om te stem en belasting te betaal nie, maar ook die aktiewe deelname aan openbare aangeleenthede, gemeenskapsprojekte, en burgerlike betrokkenheid om verandering en verbetering te bevorder. Dit kan aktiwiteite soos vrywillige werk, burgerregte-aktivisme, gemeenskapsontwikkeling, en betrokkenheid by openbare debatte en besluitneming ook insluit. Kortom, aktiewe burgerskap vereis dat burgers nie net passiewe toeskouers van die samelewing is nie, maar eerder aktiewe deelnemers wat strewe na 'n beter samelewing vir almal.

Ons weet ons as Afrikaner- maatskaplike werkers het ook 'n plekkie in die samelewing en die plekkie wat ons volstaan, maak 'n reuseverskil. Afhanklikheid van die staat en befondsing en dienslewering deur die staat mag nie in die pad staan van ons professie en die uitlewing van ons roeping om ander te dien nie. Daarom juis Mandela-dag, want ons Afrikaners hoort ook hier en daar moet vir ons ook 'n ruimte wees om aktief deel te neem aan openbare aangeleenthede, gemeenskapsprojekte, en burgerlike betrokkenheid. Ons moet ook kan help om verandering en verbetering te bevorder in die maatskaplike organisasies waar ons werk.

Elke jaar op 18 Julie word daar gevra dat ons as Suid-Afrikaners 'n bietjie van ons tyd moet gee om 'n positiewe bydrae tot iemand anders se lewe te maak. Om presies te wees: Daar word 67 minute gevra. Daar is baie meer as 67 redes waarom ons 'n maatskaplike krisisberaad wil hou en ons gaan daardie redes  tydens die geleentheid bespreek.

Ons moenie bang wees omdat ons nog nie al die oplossings het nie. Die tyd is nou reg vir ons om bymekaar te kom en gesprekke te voer om die krisisse in ons samelewing te identifiseer en saam oplossings te bedink en bewerkstellig. Ons moet saam hoop skep en die edele professie van die maatskaplike werker red, bou en bevorder. As ons nie weet wat die probleme is nie, sal ons dit nie kan aanspreek nie. Maatskaplike werkers weet dit alte goed. Die maatskaplike werker se hart is waar die saak lê; dit is daar diep binne waar die roeping rus, en dit moet opgepas word.

Ons kan onafhanklik van die staat werk. Daar is bewyse dat dit gedoen kan word – dat ons self binne 'n spesifieke raamwerk kan te werk gaan en dan 'n aspek byvoeg wat ons die mandaat gee om ons werk te doen, om te doen waarvoor ons en julle geroep is en waarvoor julle as maatskaplike werkers studeer het.